【超新星當道】紅衣醒神佳龍駒 分途揚威二級賽

4月9日（星期日），沙田馬場舉行咗兩場國際二級賽，分別係1,200米短途錦標及1,600米主席錦標。結果呢兩場一級賽前哨戰俱由超新星（Rising Star）獲得，盟主分別為蔡約翰訓練嘅「紅衣醒神」及約翰摩亞訓練嘅「佳龍駒」。

先講短途錦標，賽前大眾焦點都落喺「幸運如意」身上，議論紛紛究竟呢匹當銳嘅短途接班馬可唔可以成功擺脫二奶命。賽事開始，大部份賽駒都成功佔取擅長的位置，「幸福指數」搶放成功、「幸運如意」居中，只係「紅衣醒神」稍為後咗少少。最後400米，「幸運如意」比起季初明顯稍有疲態，並無展示預期出現嘅後勁，反而「幸福指數」喺操控步速下走勢仍勁，奈何始終不敵由莫雷拉策騎、正在冒起嘅超新星「紅衣醒神」，後駒末段跑出21.90秒，以勁勢贏出呢項主席短途獎前哨戰。賽後，「紅衣醒神」被評磅員加10分至128分，一躍成為香港最高分賽駒之一，同分馬匹有「友瑩格」及「幸福指數」。

之後就係主席錦標，由新鮮出爐嘅四歲三冠得主「佳龍駒」挑戰一眾年長馬，對手包括應屆馬王「明月千里」、今季兩項一級賽盟主「喜蓮獎星」同埋香港一哩錦鏢得主「美麗大師」。「佳龍駒」一起步已佔取一貫嘅跟前位置，沿途守喺「將男」之後取得遮檔，到600米處負責執疆嘅莫雷拉將移出望空，呢匹當紅炸子雞即以凌厲後勁透出，最後力拒「美麗大師」來犯，越級挑戰成功並取得四連勝。同「紅衣醒神」一樣，賽後「佳龍駒」被加10分，最新評分為124分。

隨住上述兩匹超新星喺二級賽坐正，香港馬壇亦正式翻開新一頁。部署方面，相信「紅衣醒神」及「佳龍駒」將會分途參戰一級賽，1,200米主席短途獎及1,600米冠軍一哩賽。且看屆時喺平磅情況下，佢地又可唔可以再次青出於藍，擊敗一眾本地及外隊佳駟喇！