【揚威國際馬壇】嘉琦杜拜奪獎 騎師算是運動員嗎？
前一篇文章提及並呼籲過一眾馬迷投票比本地見習騎師蔣嘉琦，支持佢喺阿聯酋穆罕默德酋長主辦嘅卓越賽馬頒獎典禮，競逐People’s Choice Award。結果喺3月23日嘅世界盃歡迎晚宴內公佈，嘉琦憑住喺2016年4月10日單日取得四場頭馬嘅佳績，擊敗三位勁敵成功摘下呢個獎項，讓世界馬壇有更多人認識自己，實在係香港馬壇之光！
喺頒獎禮裏面，主持形容People’s Choice Award為the best sporting moment this year，足證其實國際馬壇都視賽馬為一項運動、一項競賽，而非單純同賭搏掛勾嘅活動。講起賽馬係世界上一項受注視嘅運動，地位舉足輕重，不其然諗起最近香港舉行嘅兩個頒獎禮：<香港傑出運動員選舉>及<體育記者協會最佳運動員選舉>。
其中<香港傑出運動員選舉>因為制度及種種條件限制，令過去一年表現極為出色嘅曹星如及傅家俊等人未有得獎機會。喺公眾為幾位精英抱不平嘅時候，有無人諗過其實騎師都係運動員？騎師所面對嘅風險絕對唔比其他項目運動員低，佢地都係不斷操練體能及訓練策騎技術，爭取出賽機會，力求喺陣上實踐所學所練，當然最希望係贏得頭馬。
香港每場賽事都涉及龐大嘅投注，但係咪因為咁本地賽馬就只能成為一項同賭搏掛勾嘅活動呢？小編不時都會入場欣賞賽事感受氣氛，其中要讚星期三嘅Happy Wednesday，定期舉辦唔同嘅主題之夜同表演可以話係近年馬會相對成功之作。每場賽事馬匹衝線，歡呼聲不絕於耳，但更多時喺終點聽到嘅係馬迷鬧騎師，鬧佢地發揮有失誤（當然很大程度係因為累自己輸錢），亦涉及唔少人生攻擊，輸打贏要嘅參與態度實在令人咋舌。況且，C朗美斯都會腳頭無靈，Steph Curry都唔係場場狂轟三分啦？
唔係話要蔣嘉琦或者梁家俊可以候選最佳運動員甚至得獎（因為實在太多制肘…），但始終想社會對騎師係一種運動員、賽馬係一種運動，有一份肯定。無論有無參與賽馬，希望大家都可以學會欣賞騎師對賽馬運動嘅熱誠、付出同努力，學會欣賞呢班每日凌晨三、四點起身奮鬥嘅運動員。
以下為香港賽馬會新聞：
蔣嘉琦在杜拜贏得最受歡迎人物獎- 圖輯（2017年3月24日）
香港見習騎師蔣嘉琦於3月23日星期四在杜拜的杜拜世界盃歡迎晚宴上，獲頒最受歡迎人物獎。最受歡迎人物獎是首屆穆罕默德酋長卓越賽馬頒獎典禮所頒發的其中一個獎項，參與2016年杜拜世界盃的地區或國家，均有資格提名其具代表性的賽馬事蹟候選，而蔣嘉琦憑於2016年4月10日沙田賽馬日四勝頭馬的佳績，成為上述獎項四個候選單位之一。最受歡迎人物獎的最終得主由全球馬迷透過社交平台投票決定，蔣嘉琦以其上述成績在投票中獲得最多票數，因而獲頒發獎項。